அறிவுபூர்வமான விவாதங்கள்........

கி.பி. 1191ம் ஆண்டில் கோடைக் காலம். சுட்டெரிக்கும் வெய்யிலின் கொடுமை யமுனை நதிக்கரையின் குளிர்ந்த காற்றினால் குறைந்திருந்தது. பௌர்ணமிப் பொழுதின் முன்னிரவில் ஹாஜா நாயகம் அவர்களின் கூட்டதார்க்கு புத்த சாதுகளின் தலைவர் சாதுராமிடமிருந்து அழைப்பு வந்தது. "தாங்கள் எங்களுடைய குருநாதரின் பர்ண சாலைக்கு

வரவேண்டுகிறோம். உங்களுடைய மார்க்கத்தின் உண்மைகளை புரிந்து கொள்ளவும் எங்களுடைய கருத்துகளை உங்களோடு பகிர்ந்து கொள்ளவும் அவர் விரும்புகிறார்.

ஹஜ்ரத் ஹாஜா நாயகம் அவர்கள் எவ்விதத் தயக்கமும்மின்றி புறப்பட்டுச் சென்றார்கள். அவர்களுடைய சீடத் திருக்கூட்டம் பின் தொடர்ந்தது.பர்ண சாலையின் வாசலில் சாதுராம் தமது சீடர்களின் கூட்டத்தோடு நின்று வரவேற்றார்.

தூய வெள்ளை ஆடை அணிந்த புத்தபிட்சுகள் இடுப்பைச் சுற்றி அக்குள் வரையிலும் ஒரு துணியை வரிந்து கட்டி வலத்தோளை மூடாது விடுத்திருந்தனர். அவர்களில் சிலர் பூமாலைகளைத் தலையில் சூடியிருந்தனர். பர்ண சாலையின் உள்ளே ஊதுவத்தி மணம் கமழ்ந்தது. தியான அறைக்குள் திருக் கூட்டத்தாரை அழைத்து சென்ற சாதுராம் உயர்ந்தெழுந்த

புத்தபெருமானின் சிலையின் முன்னின்று முணு முணுத்தார்.

புத்தம் சரணம் கச்சாமி தம்மம் சரணம் கச்சாமி! சங்கம் சரணம் கச்சாமி."

பின்னர், விருந்தினர்கள் அமர்த்தபட்டார்கள். விருந்து கொடுக்கபட்டது. பின் சாதுராம் பேச்சை துவக்கினார். பெரியோரே! தாங்கள் அரேபிய நாட்டிலிருந்து வருவாதாக அறிந்தேன். இந்தியாவின் எல்லையினுள்ளே நுழைந்து வரும் யாரும் இந்த நாட்டின் பழம்பெரும் ஞானம் கண்டு ஆச்சிரியமடையாமலிருக்க முடியாது. இந்நாட்டில் தாங்கள் நுழைந்து வந்திருக்கும் நோக்கம் எதுவாக இருப்பினும் புத்தபிட்சுக்களான எங்களுடைய கடமை புத்தபெருமானின் ஞானோபதேசங்களை உங்களுக்கு உணர்த்துவதாகும்."

புத்த பெருமானின் பெருமைகளை அவர் எடுத்தோதினார். "ஆசையே பிறவிக்குக் காரணம். ஆசையை ஒடுக்க வேண்டும் அதுவே முக்திக்கு வழி. புத்த மதத்திலே ஒரு காலமிருந்தது. யோகசாதனைகளின் மூலம் ஆசையை ஒறுத்து அழிப்பதே நோக்கமாயிருந்தது. மாமுனி உப குப்தரின் தோற்றதுக்குபின் உண்மை உணரப்பட்டது. உண்மைகளை உணர்த்த வந்த புத்தபிரானே யதார்த்தத்தில் பரம்பொருளாவார் என்பதை உணர்ந்தோம். அவரை வழிப்படும் மகாயான பக்தி மதத்தை பரப்புவதிலே நாங்கள் தீவிரமாக ஈடுபட்டு வருகிறோம்."

சாதுராமின் நீண்ட சொற்பொழிவுக்குப் பின்னர் ஹஜ்ரத் அவர்கள் பேசினார்கள்.

"அறிஞர் பெருமக்களே! நல்லது உங்களுடைய ஞானமார்க்கத்தையும், பக்திமார்க்கத்தையும் உணர்ந்து கொண்டோம். நாங்கள் இந்நாட்டுக்கு வந்ததின் நோக்கம் இன்னதென்ன விளக்கும் முன்னர் உங்களிடம் மேலும் சில விஷயங்களை நாங்கள்

கேட்டறிய விரும்புகிறோம்."



ஹஜ்ரத் அவர்கள் தமது தலைமைச் சீடர் குத்புத்தீன் பக்தியார் அவர்களை நிமிர்ந்து பார்த்துப் புன்னகைத்தார்கள். அவர் தமது குருநாதரின் நோக்கத்தைப் புரிந்து கொண்டு புத்தமுனி சாதுராமின் பக்கம் திரும்பி சில கேள்விகளைத் தொடுத்தார்.

குத்புதீன்: "பெரியோரே! ஆசையே அவஸ்தைக்கு காரணமென்று கூறினீர்கள். ஆசையென்பது பரம்பொருளின் ஒர் அம்சமா? அல்லவா?"

சாதுராம்: "பரம்பொருளின் அம்சமல்ல, அது ப்ஞ்ச பூதங்களால் விளையும் பண்பு."

குத்புதீன்: "பஞ்சபூதங்கள் பரம்பொருளின் அம்சமல்ல என்று சொல்கிறீர்களா?"

சாதுராம்: பஞ்சபூதங்களும் பரம்பொருளின் அம்சம்தான். எனினும், அதன் பண்புகளில் நின்றும் தோன்றும் ஆசை மனிதனுக்கு அவஸ்தையே உண்டு பண்ணுகிறது."

குத்புதீன்: "உங்களுடைய வாதத்தில் முன்னுக்குப்பின் முரண்பாடு உள்ளது. 'நான்கு' என்பதில் இரண்டு 'இரண்டுகள்'

இருப்பதை ஒப்புக் கொள்கிறீர்கள். நான்கில் நான்கு 'ஒன்று' கள் இருப்பதை மறுக்கிறீர்கள்.. பரம் பொருளிலிருந்து பஞ்சபூதங்கள் தோன்றியதாக ஒப்புக்கொள்கிறீர்கள். பஞ்சபூதங்களிலிருந்து தோன்றும் ஆசையில் பரம்பொருள் இல்லையென்று வாதிடுகிறீர்கள்."

சாதுராம்: (மவுனம்)

குத்புதீன்: "எங்களுடைய மார்க்கத்தின் குருநாதர் முஹம்மது(ஸல்) அரபு நாட்டில் அறுநூறு ஆண்டுகளுக்கு முன்னர் தோன்றினார்கள். அவர்களின் உபதேசத்தின்படி ஆசைகள் அத்தனையும் பரம்பொருளான இறைவனின் "அமா" வெனும் இருக்கையிலிருந்தே மனிதனின் இதயத்துள் நுழைகின்றன. எனவே ஆசைகளை மனிதன் அழிக்கக் கூடாது;ஒழுங்கு படுத்தவேண்டும்."

சாதுராம்: "ஆசைகளை எப்படி ஒழுங்குபடுத்த முடியும்? சாத்தியமில்லாத ஒன்றைக் கூறுகிறீர்கள்."

குத்புதீன்: "இல்லை, சாத்தியமான ஒன்றைத்தான் கூறுகிறோம். ஆசைகளை ஒழுங்குபடுத்துவது சாத்தியமில்லை என்று நீங்கள் கூறுவது அவற்றின் மூலமான ஆண்டவனின் சர்வவல்லமை எனும் பண்பிலே குறை காண்பது போன்றது."

சாதுராம்: "ஏதோ நீங்கள் கூறுவதில் உண்மை இருப்பது போல் தோன்றுகிறது. எனினும் ஆசையின் நிலைகளான பெண்களோடு இணைந்து வாழும் வாழ்வில் முக்தி வாய்க்க வழியில்லை அல்லவா"

குத்புதீன்: "அதுவுமில்லை! ஒரு மனிதன் நான்கு பெண்களை மணந்து கொள்ளலாம் என எங்களுடைய மார்க்கத்தின் தலைவரிடமிருந்து நாங்கள் கற்றிருக்கின்றோம்."

சாதுராம்: (இரு காதுகளையும் பொத்திக் கொள்கிறார்) "அபசாரம்! சாத்தியமே இல்லை!"

குத்புதீன்: "ஏன் சாத்தியமில்லை என்கிறீர்கள்? உலகிலுள்ள யாவுமே பரம்பொருளிருந்து விளைந்து இருப்பதுதானே. நீங்கள் பெண்களை ஏன் பரம்பொருளின் அம்சமல்ல என்று கருதுகிறீர்கள்?"

சாதுராம்: "சரி அப்படியே பார்த்தாலும் ஒரு மனிதனுக்கு நான்கு பெண்கள் என்பது பொருத்தமற்றது. ஒன்றுக்கு ஒன்று என்றாவது கொள்ளலாம்."

குத்புதீன்: "மண்,நீர், நெருப்பு, காற்று இவை வானத்தில் ஒடுங்குவதில்லையா? அதுபோன்று நான்கு பெண்கள் ஒடுங்கிவிடுவற்கு ஆண்மகனிடத்திலே ஐக்கியமாகியிருநால் அவனே அவர்களுக்கு ஆன்ம வழி காட்டியும் ஆகிவிடுகிறான்."

சாதுராம்: "நல்லது பெரியோரே! உங்களுடைய மார்க்கத்தில் சில உண்மைகள் இருப்பதை நான் உணர்கிறேன்.. ஆசைக்கும் ஒர் ஒழுங்குபடுத்துதல் உண்டென்கிறீர்களே, அப்படி ஒரு விஷயத்தை உங்கள் மார்க்கத் தலைவர் போதித்திருக்கிறாரா?'

குத்புதீன்: "போதித்திருக்கிறார். "ஷரீஅத்" என்னும் சட்ட ஒழுக்கம் எங்களிடம் உள்ளது. உண்மையில் இதனை குரு நாதரான மகான் முஹம்மது(ஸல்) சொல்லவில்லை. இது பரம்பொருளான இறைவனே அவர்களுக்குத் தந்த ஞானத்திலிருந்து கிடைத்த ஒழுக்கம். இது பிரபஞ்சம் முழுதிலுள்ள மனிதர்கள் அனைவருக்கும் செல்லும்படியாகும்.

சாதுராம்: "அப்படியா? பரம்பொருளான இறைவனே தந்த ஞானமென்று உங்கள் குருநாதர் கூறினாரா?"

குத்புதீன்: "கூறினார்கள்! பரம்பொருள் இன்னதென்று புரியாததால் உங்கள் குருநாதர் புத்த பெருமான் மறைந்து பத்து நூற்றாண்டுகள் கடந்தபின் அவரையே நீங்கள் பரம்பொருளாகி வழிபடத் துவங்கியுள்ளீர்கள். எங்களுடைய குருநாதர் முஹம்மது(ஸல்) பரம்பொருளையும் சுட்டிகாட்டி, அவனுடைய பண்புகளையும் போதித்து அவன் தந்த ஒழுக்கநெறி முறைகளையும் எங்களுக்கு கற்றுத்தந்து விட்டுப் போயிருக்கிறார்."

சாதுராம்: "அவர் பெயர் என்ன சொன்னீர்கள்! புத்த பெருமான் தனக்குப் பிற்காலத்தில் பாலைவனங்களில் சம்பூர்ண ஞானாம்சான தீர்க்கதரிசி ஒருவர் தோன்றுவார் என்று கூறியதாக வரலாறு உண்டு!"

குத்புதீன்: "முஹம்மது என்பது அவர் நாமம்."

சாதுராம்: (யோசனையில் அழ்கிறார்)

ஹஜ்ரத் ஹாஜா நாயகம் : "நண்பரே! அவருடைய திருப்பெயர் 'அஹ்மத்' புகழுக்குரியவர் எனப்பொருள் படும்."

சாதுராம்: "ஹா! அஹ்மத்! இப்பெயர் புத்த பெருமான் கூறிப்போந்தது. மேலும் அவருடைய நாமம் ரிக், யஜூர் வேதங்களிலும் உள்ளது. "ஒட்டகத்தின் முதுகிலே சிரம் பணிந்தவராக அவர் நகரத்தை வெற்றி கொண்டு அதில் நுழைவார்" இதுதான் வேதவாக்கியம், அவரையா சொற்கிறீர்கள், அவருடைய கூட்டத்தினரா தாங்கள்?"

ஹாஜா ஹஜ்ரத் அவர்கள் "அல்லாஹூ அக்பர்" என்று சப்தமிடுகிறார்கள். பர்ணசாலை நடுநடுங்குகிறது. சிலைகள் குப்புறக்கவிந்து விழுகின்றன. வானில் இடி மின்னலுடன் பெருமழை பிடித்துக் கொண்டது. பர்ண சாலைக்குள்ளே

சாதுராமின் கூட்டத்தார் ஹஜ்ரத் ஹாஜா நாயகம் அவர்களின் இதயகோஷத்தில் கலந்து விடுகிறார்கள்.

"அஷ்ஹது அன்லாயிலாஹ இல்லல்லாஹ்

அஷ்ஹது அன்ன முஹம்மதர் ர்சூலுல்லாஹ்!"

சூஃபி இஸ்லாம்

சூஃபி இஸ்லாம்
எச்.முஜீப் ரஹ்மான்

சூஃபிசம் அல்லது சூஃபிவழி என்பது இஸ்லாம் மதத்திற்கு எதிரானதா இல்லை இஸ்லாத்துடன் இணைந்ததா என்பது பற்றிய பல விவாதங்கள் உலகெங்கும் இன்றும் இருக்கிறது. இந்து மதத்திலிருந்துதான் சூஃபிசம் பிறந்தது என்பதுதான் இந்த வாதத்தின் அடிப்படை. இதனால்கூட சூஃபிஸத்தை எல்லாரும் ஏற்றுக்கொள்ளமுடியாத ஒன்றாக இருப்பதாக தோன்றுகிறது.சூபியிசம் இஸ்லாத்தின் விரோதமாக பாவிக்கப்படும் வகாபிய பேரினவாத சூட்சுமங்கள் நிறைய மலிந்திருக்கையில் சூபி இஸ்லாம் குறித்து பேசுவது சரியான ஒன்றாகும்.
சூஃபி-வழி என்பது ஒரு மகானின் கல்லறையில் செய்யப்படும் வழிபாட்டு முறைகளென்று ஒரு பொதுவான கருத்தில் வாதம் இருக்கிறது இது தவறா சரியா என்பதை விவாதிப்பதைவிட இறைவனை அடையும் ஒரு வழிகளில் இதுவும் ஒன்றுதான் என்கிற கண்ணோட்டத்தில் எந்தமுறையும் தவறானதில்லை என்பது என் கருத்து. சூஃபிசம் விவாதங்கள் எப்படி இருந்தாலும் சூஃபி இசையை அனைவரும் ரசிக்க முடியும்.
சூஃபி இஸ்லாமின் அடிப்படைக் கொள்கை சுல்ஹ்-இ-குல் என அழைக்கப்படுகிறது. இதன் பொருள் 'அனைத்துடனும் சமாதானம் ' என்பதாகும். பெர்ஷிய மொழியில் குரானென மதிக்கப்படும் மாஸ்னவி என்ற புத்தகத்தை எழுதிய மெளலானா ருமி தன்னுடைய கவிதைகளில் ஒன்றில் ஒற்றுமையை ஏற்படுத்த வந்ததாகவும், பிரிவினையை ஏற்படுத்த வரவில்லை என்றும் எழுதுகிறார். ஒருமை அல்லது இணைப்பு (வஸல்) என்பதே சூஃபி கவிதைகளில் அடிப்படை கருத்தாக்கம்.
இன்னொரு மாபெரும் சூஃபி துறவியான முஹியுத்தின் இபின்-ஈ-அராபி பேசிய புகழ்பெற்ற கொள்கையான 'இருப்பின் ஒருமை ' (unity of being அல்லது அத்வைதம் வாஹ்தட்-அல்-வுஜ்உத் ) பல வழிகளில் புரட்சிகரமானது. இந்தக் கொள்கையின் முக்கியமான அங்கம், உண்மையான பொருள் என்பது ஒன்றுதான், அதாவது கடவுள் மட்டுமே உண்மையான பொருள். நாம் எல்லோரும் அதன் வெளிப்பாடுகள் (manifestations). உலகின் எல்லா மனிதர்களும், எந்த மதத்தைப் பின்பற்றினாலும், கடவுளின் படைப்புக்களே என்பதையும், அவைகள் எல்லாமும் மதிக்கப்பட வேண்டும் என்பதையும் கோடிட்டுக்காட்டுகிறது. இந்தக் கொள்கை மனிதர்களைப் பிரிக்கும் எல்லா சுவர்களையும், சமூக வெறுப்புக்களையும் இடித்துத் தள்ளுகிறது.
சூஃபி இஸ்லாம் அன்பு மயமானது. மசூதிகளில் பேசப்படும் இஸ்லாம் சட்டப்பூர்வமானது, (ஷாரியா என்ற இஸ்லாமிய சட்டத்தை முக்கியப்படுத்தியது. இதுவே முக்கியமான வித்தியாசம்). மதத்தத்துவவாதிகளால் ( theologians) ஷாரியா சட்டத்துக்குப் புறம்பாக நடந்து கொள்பவர்களை மன்னிக்க முடிவதில்லை. ஆனால், சூஃபி இஸ்லாம் அன்பு மயமானதென்பதால், ஷாரியாவை எல்லாம் முக்கியமாகக் கருதுவதில்லை. அது அன்புக்கு முக்கியத்துவம் கொடுக்கிறது. மானுடம் மீது அன்பு; கடவுளின் மீது அன்பு. என்னுடைய இருதயத்தின் மையம் அன்பில் இருக்கிறது, என் இருதயமே மசூதி, கோவிலல், மாதாகோவில், யூதக்கோவில் என்று முஹியுதின் இபின் அராபி சொல்வதில் ஆச்சரியமில்லை.
இந்தியாவில் இருக்கும் எல்லா சூஃபிகளும் சிஸ்டி கற்பித்த டஸாவஃப் (சூஃபியிஸம்) இனை பின்பற்றுகிறார்கள். இது முஹியுதின் இபின் அராபி அவர்களது வாஹ்தட்-அல்-வுஜ்உத் கொள்கையின் 'இருப்பின் ஒருமை ' யின் படி, கடவுளின் பார்வையில், ஒரு மனிதனின் கடவுள் நம்பிக்கையோ, அவனது கடவுள் நம்பிக்கையின்மையோ எந்தவித வித்தியாசத்தையும் ஏற்படுத்துவதில்லை. சூஃபிகளுக்கும், இஸ்லாமிய மதத்தத்துவவாதிகளுக்கும் உள்ள இன்னொரு வித்தியாசம், சூஃபிகள் பிராந்திய மொழிக்கும், பிராந்திய கலாச்சாரத்துக்கும், பிராந்திய பாரம்பரியத்துக்கும் முக்கியத்துவம் கொடுத்தார்கள்;ளிஸ்லமிய மதத்தத்துவவாதிகள் 'தூய இஸ்லாம் ' என்பதற்கு முக்கியத்துவம் கொடுத்து, பிராந்திய கலாச்சாரத்துக்குள் முஸ்லீம்கள் இணைவதை எதிர்த்தார்கள்.
11ஆம் நூற்றாண்டு பஞ்சாப் மாநிலத்தின் சிறந்த சூஃபியான பாபா ஃபாரித் அவர்கள் பெர்ஷிய மொழியிலும், அராபிய மொழியிலும் பாண்டித்யம் பெற்றவராக இருந்தாலும், பஞ்சாபி மொழியிலேயே தன் கவிதைகளை எழுதினார். சொல்லப்போனால், அவர்தான் பஞ்சாபி கவிதையின் பிதாமகர். குரு நானக் தன்னுடைய ஆதி கிரந்த் சாஹிப்பில் பாபா பாரித் அவர்களது 112 கவிதைகளை சேர்த்திருக்கிறார். சீக்கியர்கள் பாபா பரித் மீது மிகுந்த மரியாதை கொண்டிருக்கிறார்கள். சிஸ்டி கற்பித்த சூஃபி வழியில் வந்த மிகவும் மூத்த துறவிகளில் ஒருவர் பாபா பாரித்.
இந்த தாராளவாத பள்ளியின் முக்கியமான இன்னொரு சூஃபி துறவி, இவரது சீடரான நிஜாமுதின் அவுலியா. இவர் டெல்லியில் அடக்கம் செய்யப்பட்டிருக்கிறார். இவரைப்பற்றிய ஒரு புகழ்பெற்ற கதை இன்னமும் சொல்லப்படுகிறது. இவர் ஒருமுறை யமுனை நதிக்கரையில் குளித்துக்கொண்டிருந்த சில இந்துப்பெண்கள் சூரியனைக் கும்பிடுவதைப் பார்த்தார். அவர் தன்னுடைய புகழ்பெற்ற சீடரான குஸ்ரோவிடம், இந்தப்பெண்களும் கடவுளை தங்களுடைய வழியில் கும்பிடுகிறார்கள் என்று கூறி, குரானிலிருந்து ஒரு வசனத்தை ஓதினார். 'ஒவ்வொருவரும் அவர்கள் திரும்ப ஒரு திசையைக் கொண்டிருக்கிறார்கள். ஆகவே, நல்ல வேலை செய்வதில் ஒருவரோடொருவர் போட்டியிடுங்கள் ' (2:148) ( 'And every one has a direction to which he turns (himself), so vie with one another in good works '. (2:148) )
குரானின் உண்மையான செய்தி 'நல்ல வேலைகளைச் செய்வதில் ஒருவரோடொருவர் போட்டியிடுங்கள் ', சடங்குகளைப் பற்றி சண்டை போடாதீர்கள் என்பதுதான். இந்த செய்தியே சூஃபி துறவிகளால் அழுத்தம் திருத்தமாகச் சொல்லப்பட்டது. அதனாலேயே, லட்சக்கணக்கான மக்கள் மத சார்புகளைத் தாண்டி, இந்த சூஃபி கோவில்களில் வந்து அவர்கள்க்கு மரியாதை செய்கிறார்கள். க்வாஜா மொயினுத்தின் சிஸ்டி அவர்களின் புகழ் பெற்ற சீடரான ஹாமிதுத்தின் நகோரி, தன்னைச் சுற்றி இருப்பவர்களை மதிக்கும் வண்ணம் சைவ உணவு மட்டுமே சாப்பிடுபவராக ஆனார். அவர் ஒரு பசுவை வளர்த்துவந்தார். ஒரு இந்து விவசாயியை போலவே அவர் நிலத்தை உழுதார். தீவிரமான சைவ உணவுக்காரராக இருந்தார்.
க்வாஜா மொய்னுதீன் சிஸ்டி இந்தியாவின் புகழ்பெற்ற சூஃபி துறவி. ஒவ்வொரு வருடமும் லட்சக்கணக்கான இந்துக்களும், முஸ்லீம்களும், பார்ஸிகளும் கிரிஸ்துவர்களும் அவரது கோவிலுக்கு வருகிறார்கள். சிஸ்டி அவர்கள் தன்னைச் சுற்றி இருந்தவர்களின் கலாச்சார பழக்க வழக்கங்களை ஏற்றுக்கொண்டார். க்வாஜா அவர்களது கோவிலின் மடைப்பள்ளி எப்போதும் சைவ உணவை மட்டுமே சமைக்கிறது. ஏனெனில் அப்போதுதான், ஜாதி மத சார்பின்றி அனைவரும் அங்கு உணவருந்த முடியும் என்பதே காரணம்.. இந்த சூஃபி துறவிகள் அப்போதைய அரசர்களிடமிருந்து விலகியே இருந்தார்கள்.
நிஜாமுதின் அவுலியா தன்னுடைய வாழ்நாளில் ஐந்து சுல்தான்களைப் பார்த்துவிட்டார். இருப்பினும், அவர் எந்த ஒரு சுல்தானின் தர்பாருக்கும் செல்ல மறுத்துவிட்டார். அவரிடம் தெரிவிக்காமல், அவர் இருக்கும் இடத்துக்கு ஜலாலுதீன் கால்ஜி வந்து அவரைப்பார்க்க விரும்பியபோது, நிஜாமுதீன் அவுலியாவின் சீடரான குஸ்ரோ சென்று அவுலியாவிடம் இதனை தெரிவித்தார். சுல்தானைப் பார்க்க விருப்பமின்றி இன்னொரு வாசல் வழியாக அவுலியா வெளியே சென்றுவிட்டார். உர்து கவிஞரான இக்பால் இந்தக் குணத்தை ஷான்-ஈ-தர்வேஷி என்று அழைக்கிறார். (அதிகாரத்தில் இருப்பவர்களைப் பற்றிய கவலையின்மை)
இந்த சூஃபிகள், மதபேதம் , ஜாதிபேதம் இன்றி எல்லோருடனும் கலந்துறவாடினார்கள். சமூகத்தில் மரியாதை கிட்டாத, தாழ்த்தப் பட்ட சாதியினர் இதனாலேயே இவர்களைச் சுற்றி குழுமினார்கள். இவர்களிடம் அவர்கள் மனிதர்களுக்கு உரிய மரியாதையும், துயருற்ற உள்மனத்துக்கான ஆறுதலையும் பெற்றார்கள்.
'Those who disbelieve in Allah and His messengers and desire to make a distinction between Allah and His messengers and say: we believe in some and disbelieve in others; and desire to take a course in between — these are truly unbelievers '. (4:150-51) என்று குரான் சொல்வதை சூஃபிகள் உண்மையுடன் பின்பற்றினார்கள். சூஃபி துறவிகள் அல்லாவின் ஒருதிறைத்தூதருக்கும் இன்னொரு இறைத்தூதருக்கும் எந்த வித வித்தியாசமும் பார்க்காமல் மரியாதை செலுத்தினார்கள். அல்லா இந்தியாவுக்கும் இறைத்தூதர்களை அனுப்பினார் என்று சூஃபிகள் நம்புகிறார்கள். இந்த சூஃபிகள் உண்மையிலேயே அமைதிக்கும் சமாதானத்துக்கும் வழி வகுக்கும் பெரியோர்கள்.
சுபி கதையொன்றை பார்ப்போம்.
இரு மகன்களுக்குத் தந்தையான ஒருவர், தீடிரென காலமானார். அவர் விட்டுச் சென்றிருந்த சொத்துக்களை பங்கிட்டுகொள்வதில் சகோதரர்களுக்கிடையே சண்டை முளைத்தது. குறிப்பாக அண்ணன்,தம்பிக்கு குறைவான பங்கைக் கொடுத்து தான் அதிக ஆதாயம் அடைய நினைத்தான். அப்போது அந்த ஊரில் தங்கியிருந்த சூஃபி ஞானியிடம் சென்று தம்பி முறையிட்டான். ஊர் மக்கள் மத்தியில் அவர்கள் இருவரிடையேயும் சமரசம் செய்து வைக்க முன் வந்தார் ஞானி.
மூத்தவனிடம் "ஏன் நீ இவ்வாறு செய்கிறாய்..?" என்று கேட்டார். அவனோ "சாகும் தருவாயில்,எனக்கு பிடித்ததை தம்பிக்கு கொடுக்கச் சொல்லி தந்தையார் என்னிடமிருந்து வாக்கு பெற்றார்" என்றான். "சரி, நீ தம்பிக்கு எதையேல்லாம் கொடுக்கப் போகிறாய்?" என்று ஞானி கேட்டபோது, ஒரு சிறு பட்டியலை அவரிடம் காட்டினான் அண்ணன்.

"மீதியேல்லாம்?"
"எனக்கு'
"நீ எடுத்துக் கொண்ட இதெல்லாம் உனக்கு மிகவும் பிடித்ததா?'
"ஆமாம் அதனால்தான் எடுத்துகொண்டேன்."
"ஆனால் உனக்கு பிடித்ததை உன் தம்பிக்கு கொடுக்க வேண்டும் என்றூ உன் தகப்பனார் சொன்னதாக நீதானே சொன்னாய்? அதனால் உனக்கு படித்ததாக நீ எடுத்துக்கொண்டிருக்கும் இதையெல்லாம் நீ உன் தம்பிக்குத்தான் கொடுக்க வேண்டும். அவனுக்கு கொடுத்திருக்கும் பங்கை நீ எடுத்துக்கொள்ள வேண்டும். உன் வாதப்படியே அதுதானே சரி?" ஞானியின் இந்த கேள்விக்கு அண்ணனால் பதில் சொல்ல முடியவில்லை. தலை குனிந்துக் கொண்டான்.

உடனே தம்பி "ஐயா, எனக்கு இவ்வளவு பங்கும் வேண்டாம். எனக்கும் அண்ணனுக்கு சமமாகவே பிரித்துக்கொடுக்க ஏற்பாடுகள் செய்துகொடுங்கள், போதும்." என்று ஞானியிடம் சொன்னான். அண்ணன் இன்னும் கூனிக் குறுகிப் போனான்.

ஹெச்.ஜி.ரசூல் எழுதிய புதிய திறனாய்வு பின்நவீனத்துவ வாசிப்பில் இஸ்லாம்பிரதிகள்

By கவிஞர் நட.சிவகுமார்

பின்நவீனத்துவ வாசிப்பில் இஸ்லாத்தின் பிரதிகளை அணுகும் தமிழின் முதல்நூலென இதைச் சொல்லலாம்.

மைலாஞ்சி கவிதைநூல்வழியாக வெகுவாக அறியப்பட்ட ஹெச்.ஜி.ரசூலின் இந்தப் படைப்பு நாட்டார்மரபு துவங்கி மத்தியகிழக்கு அரபுநாடுகளிலும் உலக அளவிலும் பேச்ப்படுகிற இஸ்லாமிய மரபுகளை ஊடிழைப்பனுவலாய் மீளாய்வு செய்கிறது.பண்பாட்டு இஸ்லாம் கருத்தாக்கத்தை இதன்மூலம் வந்தடைய முடியும்.

சூபிகளின் மாற்று உரையாடல், நியோசூபிசம்,சூபி இசை,அடித்தள மக்களின் தர்காபண்பாட்டு அரசியல், வெகுஜன இஸ்லாம் என்பதான தமிழ்மண்சார் அடையாளங்களை உள்வாங்கிய இஸ்லாத்தின்பரப்பு இந்நூலின் அறிமுகமாகிறது.

காலனியாக்கத்திலிருந்து விடுதலை பெற்ற மூன்றாம் உலக நாடுகளின் முஸ்லிம் அறிஞர்கள் முன்வைக்கும் பின்காலனிய இஸ்லாமிய சிந்தனை பாசிச ஆக்ரமிப்புக்கு எதிர் அணிதிரட்டலான இஸ்லாம் அரசியல் என இதன் எல்லைகள் விரிவடைகிறது.

வகாபிசமும் நவீனமுதலாளியமும்,தெளகீதுபிராமணீயம்,ஏகத்துவ அரசியலின் தோற்றுவாய்

என மாறுபட்ட சிந்தனை உலகங்கள் விவாதத்திற்கு உட்படுத்தப்படுகிறது.

அரபுவழிப்பட்ட மரபுவழி நிறுவன இஸ்லாம் முன்வைக்கும் ஷரீஅத் குற்றவியல்தண்டனைச் சட்டங்கள்

மீள வாசிக்கப்படுகிறது.புனிதப்பிரதிகளை ஆதாரங்களாக்கி கட்டமைக்கும் அடிப்படைவாதம்,தீவிரவாதத்தை திருக்குரானின் புனிதம்சார்ந்த கற்பிதங்கள் கட்டவிழ்த்து காட்டுகிறது.

பின்நவீன அரபுப் பெண்ணியம் பிறிதொரு தளத்தின்குரல். புனைவு மொழியாடல்கள் கறுப்பு இஸ்லாம் ஜிகாத் தலித்முஸ்லிம் என சொல்லப்படாத சமகால இஸ்லாத்தின் பன்முகத்தன்மை இங்கு பரிசீலனைக்கு உள்ளாகிறது

சென்னை மருதாபதிப்பகம் இந்நூலை வெளியிட்டிருக்கிறது.இந்நூலில் கீழ்கண்ட கட்டுரைகள் தொகுக்கப்பட்டுள்ளன.

1) சூபிகளின் மாற்று உரையாடல்

2) சூபி இசை - இதயத்திலிருந்து ஒரு செய்தி

3)வகாபிசமும் நவீன முதலாளியமும்

4)தர்கா பண்பாட்டு அரசியல்

5)நாட்டார் இஸ்லாம்

6)மவ்லிதுகளின் யதார்த்தமும் புனைவு மொழியாடல்களும்

7)தெளகீது பிராமணர்களின் கூர்மழுங்கிய வாள்களும்

வெட்டுப்பட்ட சில பண்பாட்டுத் தலைகளும்

8)ஏகத்துவ அரசியல் மற்றும் சமயமரபுகளின் தோற்றுவாய்

9)கறுப்பு இஸ்லாம்

10)ஷரீஅத் குர்றவியல் - ஒரு மறுவிவாதம்

11)பின்நவீன அரபுப் பெண்ணியம்

12)திருக்குரானின் புனிதம்சார்ந்த கற்பிதங்கள்

13)மறுசிந்தனையில் திருக்குரான்

14)இஸ்லாமியச் சொல்லாடல்களின் பன்முகப்புரிதல்

மொத்தம் 128 பக்கங்கள் கொண்ட இந்நூலின் விலை ரூ80/

நூல் கிடைக்குமிடம்

மருதா,2/100 5வது குறுக்குத்தெரு,குமரன்நகர்,சின்மயாநகர்,சென்னை - 92

தமிழ்நாடு,இந்தியா

பேச 09382116466

மின்னஞ்சல்

Marutha1999@rediffmail.com

அர்சால்

By ஹெச்.ஜி.ரசூல்

இந்தியாவில்வாழும் தலித்முஸ்லிம்களின் உரிமைகளையும்,குரல்களையும் பதிவு செய்யும் வகையில் இந்தியன் தலித் முஸ்லிம்ஸ் வாய்ஸ்( IDMV) ஜூலை 22 , 2008-ல் உருவாகியுள்ளது. இது ஜனநாயக் ரீதியான ஒரு பரந்துபட்ட விவாததளத்தை முன்னிறுத்துகிறது. இதன் முக்கிய நோக்கங்களில் ஒன்று 1950 களில் மறுதலிக்கப்பட்ட உரிமையைமீண்டும்திரும்பப்பெறுதலாகும்.தலித்முஸ்லிம்களையும் பட்டியலில் உள்ள சாதியினர் மற்றும் பழங்குடியினர் பிரிவில் சேர்த்திடவும் இதற்குதடையாக இருக்கிற இந்திய அரசியல் சாசனபிரிவு 341 - ல் திருத்தம் கொண்டுவரவும் கோரிக்கைகளை முன்வைத்துள்ளது.இந்திய அரசியல் சாசன பிரிவு 341 முஸ்லிம் மத அடிப்படையில் இட ஒதுக்கீடு வழங்க மறுக்கிறது. இந்து சமய அடிப்படையில் பட்டியலில் உள்ள சாதியினர் மற்றும் பழங்குடியினருக்கு உள்ள இட ஒஅதுக்கீட்டு உரிமையை முஸ்லிம் மற்றும் கிறிஸ்தவ சமய தலித்களுக்குவழங்க மறுப்பது,சட்டத்தின் முன் அனைவரும் சமமென்கிற அரசியல் சாசனபிரிவு14,சமய அடிப்படையிலான சமூக ஏற்றத்தாழ்வுகளை தடை செய்கிற இந்திய அரசியல்சாசன பிரிவு15, எந்த ஒரு சமயத்தை ஏற்றுக் கொள்ளவும் ,செயல்படுவதற்குமான சுதந்திரத்தை தந்துள்ள அரசியல்சாசனபிரிவு 25 ஆகியவற்றிற்கு எதிரானதாக இருப்பதாக அறிவிக்கிறது.

1950களில் அரசியல்சாசன ஆணையில் இடம்பெற்ற முஸ்லிம் அர்சால் அல்லது முஸ்லிம்தலித் பிரிவினர்களை இதில் அடையாளப்படுத்தவும் இவ்வமைப்பு உரிமை கோருகிறது. அந்த வகையில் நட்( Nutt) பக்கோ(Bakkho) பத்தியாரா(Bhatiyara) குஞ்ரா(Kunjra )துனியா(Dhunia) கலால்(Kalal)தப்லி(Dafali) கலால்கார்(Halakhor)டோபி(Dhobi) லால்பெகி(Lalbegi) கோர்கான்(Gorkan) மீர்சிகார்(Meershikar) சீக்(Cheek) ரங்கிர்ஸ்(Rangrz) தர்ஸி(Darji) மோசிஸ்(Mochis) முக்ரிஸ்(Mukris)மற்றும் கருடிஸ்(Garudis) ஆகிய உட்பிரிவுகள் முஸ்லிம்தலித்களின் வரிசைப்பட்டியலில் இடம்பெறுகின்றனர்.

இஸ்லாம் சமய அடிப்படையில் இந்துமத வர்ணவகைப்பட்ட சாதீயத்தை ஒப்புக் கொள்ளவில்லை என்றபோதிலும் சாதீயக் கூறுகளைப் போன்றே சமூகப் படிநிலைகள் இந்திய முஸ்லிம்களிடத்தும் வேரூன்றியுள்ளதை மறுத்துவிடமுடியாது.இந்துக்களால் பாதிப்படையும் தலித்துகளைப்போலசமூகரீதியாகமுஸ்லிம்தலித்களும்பாதிப்படைந்துள்ளார்கள்.பொருளாதாரரீதியாகவும் கல்வியிலும்,கலாச்சார அளவிலும் மிகவும் பலவீனமான நிலையில் முஸ்லிம்கள் உள்ளார்கள்

ஈத் பெருநாளில்கூட பொதுவான முஸ்லிம்கள் தலித்முஸ்லிம்களோடு இணைந்து உணவு உண்ணுவதற்கும் கட்டியணைத்து வாழ்த்துக்களை பரிமாறிக் கொள்வதற்கும் வழியற்று ஒதுக்கப்பட்டவர்களாக இருக்கிறார்கள்.

இந்நிலை தீர்க்கப்படவும், அரசியல்ரீதியான அதிகாரத்தை பெறுவதற்குதலித்மற்றும்இதரபிற்படுத்தபட்டமுஸ்லிம்களின்பிரதிநிதித்துவம்,கமிஷன்கள்,அரசுநிறுவனங்கள்,முஸ்லிம் அமைப்புகளில் வழங்கப்படவேண்டும்.மதசார்பற்ற கட்சிகள் அரசியல்ரீதியாக இந்த முன்னுரிமையை வழங்கவேண்டும்

மத்திய மாநில அரசுகள் இட ஒதுக்கீட்டு கொள்கையில் தலித்முஸ்லிம், மற்றும் இதர பிற்படுத்தப்பட்ட முஸ்லிம்களுக்கு முன்னுரிமை அளிக்க தகுந்த சட்டரீதியான உரிமை அளிக்கப்படவும் வேண்டும், தலித்முஸ்லிம்களுக்கான இடஒதுக்கீடு முஸ்லிம்களுக்கு பாதிப்பு ஏற்படுத்தும் என்பதான தவறான விவாதங்களை சரிப்படுத்தவும் வேண்டியுள்ளது.பெரும்பகுதிமுஸ்லிம்கள் சமூக பொருளாதாரம், கல்வி,சுகாதாரம் மற்றும் அரசியல் நிலைகளில் பின் தங்கியுள்ள நிலையில் முஸ்லிம்களிடத்தில் ஒற்றுமை, சமூகநீதி,ஏற்கெனவே நிலவுகிறது என்பது தவறான வாதமும் அணுகுமுறையுமாகும்.

இது பற்றி சமூகவியலாளர் முகமது ஷஹான் ஷஹா அன்சாரி மேலும் குறிப்பிடும்போது பின் தங்கிய முஸ்லிம்களுக்கு கல்வி, சுகாதாரம் உள்ளிட்ட அம்சங்களில் வாய்ப்புகளை ஏற்படுத்திதருவதும், முஸ்லிம்பிரிவுகளுக்குள்ளே சாதிக்கலப்பு திருமணங்களை ஊக்குவிப்பதும், ஆணாதிக்க மேலாண்மைக்கு எதிராக இஸ்லாம் கூறும் பெண்ணுக்கான சம் உரிமைகளை நிலைநாட்டுவதும் அவசியமாகும் என்கிறார்.

விரிவடையும் இஸ்லாமியப் பார்வை

விரிவடையும் இஸ்லாமியப் பார்வை

களந்தை பீர்முகம்மது


இஸ்லாம் குறித்து இன்று உலக அளவில் விவாதிக்கப்பட்டு வருகின்றது. முஸ்லிம்களின் அரசியல் அணுகு முறைகள் மற்றும் வாழ்க்கைச் சூழல்கள் குறித்தும் விரிவான அளவில் பேசப்படுகின்றது. அதே சமயத்தில் இஸ்லாத்தின் உட்கூறுகள் பற்றிப் பல்வேறு முஸ்லிம் அறிஞர்களும் குர்ஆனையும் ஹதீஸ்களையும் ஆராய்ந்து வருகின்றனர். தம் மனதிற்குகந்த முடிவுகள் எனில் அதை வரவேற்பதும் ஒப்புக்கொள்ள முடியாத பட்சத்தில் கடும் எதிர்ப்புக் காட்டுவதும் ஒருசேர நடந்துவருகின்றது. மாற்றுக் கருத்துகள் முன்வைக்கப்படுகையில், அதற்கு முகம் கொடுத்துத் தக்க பதில்கள் கூற ஏராளமான வாய்ப்புகளும் உண்டு. ஆனால் அது போன்ற வாய்ப்புகளைச் சமூகம் நிராகரித்துவிடுகின்றது. ஹெச்.ஜி. ரசூல் இது போன்ற விஷயங்களை எதிர்கொள்கிறார்; உடன்பாடாகவோ சற்றே எதிர்மறையாகவோ பதில் கூறுகிறார். ஆனாலும் காலங்காலமாகக் கட்டிவைக்கப்பட்டுள்ள கருத்துகளின் மேல் ஒரு சிறு விலகல் நேர்ந்தாலும் அதை ஒப்புக்கொள்கிற சூழல் இல்லை, விவாதிப்பதும் இல்லை.

‘குர்ஆனிய மொழியாடல்கள் - மீள் வாசிப்பின் தருணம்’ என்பது அவருடைய புதிய தொகுப்பு நூல். முக்கியமான பத்துத் தலைப்புகள் இதில் உள்ளன. மதம் என்றாலே உணர்ச்சிமயமானது. மற்றவர்கள் உணர்ச்சிமயமாய் இயங்குகின்ற தளத்தில், ரசூல் அறிவுபூர்வமாக இயங்குகிறார். கீலீஹ் மி ணீனீ ஸீஷீt ணீ னீusறீவீனீ எனும் இப்னு வராக்கின் நூல் குறித்து ரசூல் கூறும்போது, ‘இஸ்லாத்திற்கு எதிரான இத்தகைய கருத்துப் படிமங்களை இஸ்லாமிய அறிஞர்கள் கருத்தியல் ரீதியில் எதிர்கொள்ள வேண்டியிருக்கிறது; புனிதங்களின் பெயராலோ மரபுவழி குர்ஆனிய ஆய்வு அணுகுமுறைகளாலோ இவற்றை எதிர்கொள்ள முடியாது’ என்றுதான் தன் கருத்தை முன்வைக்கிறார். பின்-நவீன கால நெருக்கடிகளையொட்டி குர்ஆனை ஆழமாக வாசித்துப் புதிய அர்த்தங்களைக் கண்டடைய வேண்டும் என்கிற நோக்கிலேயே அவருடைய இந்தத் தொகுப்பு அமைந்துள்ளது.

‘மௌனங்களைப் பேசவைத்த தப்ஸீர்’ எனும் கட்டுரை விளிம்புநிலை அரசியலுக்கான தேடலை முன்வைக்கின்றது. ‘அவர்கள் மறைவானவற்றை நம்புவார்கள்; தொழுகையைக் கடைபிடிப்பார்கள்; நாம் அவர்களுக்கு வழங்கியவற்றிலிருந்து (பிறருக்கு) செலவுசெய்வார்கள் (2:3)’ என்கின்ற இந்த வசனம் இறைவழிபாட்டை முன்னிறுத்தும் அதே அளவிற்குத் தானம் வழங்குதலையும் முன்வைக்கின்றது. தொழுகையை நிறைவேற்ற அனைவரும் தக்க மனநிலை கொண்டவர்கள்தான். ‘ஜகாத்’ எனப்படும் செலவு - ஒருவருடைய வருவாயில் 2.5 சதவிகிதம் மாத்திரமே. ஆனால் நடைமுறையில் ‘தொழுகை’ அளவிற்கு ஜகாத் முன்னிலை பெறுவதில்லை. ஏன் இவ்வாறு ஆக வேண்டும்? அது ஒரு பொருளாதாரம் சார்ந்த பிரச்சினை; தொழுகையைப் போன்ற ஓர் உடல் மொழி அல்ல. ஒரு மனிதனின் தேவை என்ன அளவில் என்பதை எவராலும் நிர்ணயம் செய்ய முடியவில்லை. உலகமயம் குவிக்கும் நுகர்வுப் பொருள்கள் ஒரு மனிதனைப் பித்துறச் செய்கிறது. ஆசைக்கான எல்லைக் கோடுகள் தாமாகவே அழிந்துவிடுகின்றன. இதில் ‘ஜகாத்’ பற்றிய சிந்தனைகள் தாக்குப்பிடிப்பதில்லை. எனவே, ஒருவனின் பொருளாதார நிலை மார்க்கக் கடமையின் மீதான பற்றுதலை ஓரங்கட்டி விடுகின்றது. நம் பொருளாதாரத்தை மீறி ஆன்மிகம் சுடர்விட முடிவதில்லை. இங்கேதான் ஆன்மிக நாட்டத்தையும் பொருளாதார வாழ்வையும் இணைத்துப் பரிசீலித்து, மாற்று வழிகளைத் தேட வேண்டும். இந்தப் புள்ளியில் ரசூலின் பயணம் தொடர்கின்றது; மார்க்க மேதைகளின் பயணம் நின்றுவிடுகின்றது. பயணத்தைத் தொடர்வோர்க்கு எந்த முரண்பாடுகளும் இல்லை; தொடர முடியாமலும் தொடர விரும்பா மலும் நின்றுவிடுவோர்க்கு அதன்பின் சொல்லப்படும் எல்லாக் கருத்துகளும் முரண்படுகின்றன. இந்தத் தேக்கமே உலகளாவிய பல நெருக்கடிகளையும் முஸ்லிம் சமூகத்தின் மீது கொண்டு வந்து திணிக்கிறது. இதைக் கடைசி வரையிலும் ஆன்மிகக் கருத்தியல்களுக்கு உள்ளேயே பேசி முடிப்பதால், ‘இஸ்லாமியச் செல்வம்’ பங்கீடு செய்யப்பட முடியாமல் போகின்றது. சவூதி மன்னர்கள் செல்வச் செழிப்பில் மிதக்க, மிக அண்மையிலுள்ள எதியோப்பியாவில் தாய்ப்பாலுக்காகப் பரிதவிக்கும் ஒரு முஸ்லிம் நீக்ரோ குழந்தையைக் கழுகு தன் விருந்தாகத் தூக்கிக்கொண்டு செல்கின்றது.

குர்ஆன் சமூகத்தை நோக்கிய ஒரு பிரகடனம். அந்தக் குர்ஆனியத் தளத்தில் நின்றபடிக்கே வெளியுலகை எட்டிப் பார்க்கலாம். இஸ்லாமியப் பொருத்தப்பாட்டைக் கருதி விவாதம் செய்யலாம். ஆன்மிகக் கருத்திலேயே நின்று உழலும்படி குர்ஆனோ ஹதீஸ்களோ வலியுறுத்துவதில்லை. ஆனால், குர்ஆன் இன்றளவிலும் ஓர் ஆன்மிகப் பிரதியாக மட்டுமே வாசிக்கப்படுகின்றது.

குர்ஆனியத் தத்துவயியலும் சூஃபித்துவமும், பீர்முகம்மது வலியுல்லாவின் குர்ஆனிய உரையாடல் என்கிற இரண்டு கட்டுரைகளும் சூஃபிசத்தின் விரிவைக் காண்பவை. சூஃபித்துவம் உலகளாவிய கண்ணோட்டத்தைக் கொண்டிருப்பினும் தமிழ்ச் சிந்தனையின் தனித்த அடையாளமும் கொண்டது என்கிறார் ரசூல். சூஃபித்துவமும் ஆன்மிகக் கருத்தையே பேசுகின்றது. ஆனால் அதன் அடிப்படையை வரையறுக்கக் காரணமாயிருந்தவை அரசியல் கருத்தாக்கங்கள்; லௌகீக வாழ்வில் காணப்பட்ட வெறித்தனமான சுயநலப் போக்குகள்! இறைவழிபாட்டை வெறும் சமயச் சடங்காச்சாரமாக்கியவர்களுக்கு எதிரான கருத்துகள் சூஃபித் துவத்தில் அடங்கியுள்ளன. சூஃபிகள் மக்களுக்குச் சேவையாற்றவும் மனித மனங்களை அன்பால் இணைக்கவுமான செயல்பாடுகளைக் கொண்டவர்கள். மேலும் இஸ்லாமியக் கலை இலக்கியத்தின் விதைகள் சூஃபித்துவத்தின் பயன்களே! இலக்கியம் தழைக்கும்போது மக்கள் நலனுக்கான போராட்டங்களும் தோன்றிவிடுகின்றன அல்லவா? இஸ்லாமிய அரசர்கள் சூஃபித்துவத்தை இதன் காரணமாகவே தான் வெறுத்தார்களோ? பீர்முகம்மது வலியுல்லாவின் ஞானப்புகழ்ச்சியில் வரும் பல வரிகளில் ஏழ்மை, வறுமை, பசி போன்ற சொல்லாடல்கள் இடம் பெறுவது மட்டுமல்லாமல் வித்தார வாழ்வு தருவாய், குறையாத செல்வம் தருவாய் போன்ற வேண்டுதல்களும் இடம்பெற்றுள்ளன. சூஃபித்துவம் ஆன்மிகத்தை மாத்திரமே பேசாமல், மக்களின் வாழ்நிலை பற்றியும் பேசுவதால் அரசர்களின் பீடம் அசைவதற்கான இயக்கு சக்திகள் உண்டாகின்றன. இலக்கிய வடிவங்களை நிராகரிப்பதின் மூலம் இஸ்லாமிய அரசாட்சிகள் வறட்டுத் தன்மையைக் கொண்டுள்ளன. சமூக அவல நிலைகளைக் கண்ணுறும் பீரப்பா, அதிகாரத்திலிருந்து மீட்சிபெறும் வழியைத் தேடுகிறார். அதிகாரத்திலிருந்து மீட்சி பெறுவதை அரசர்கள் விரும்புவார்களா?

இலண்டன் நகரிலுள்ள ஒரு பல்கலைக்கழகத்தில் பின் காலனியக் கல்வியியல் பேராசிரியராகப் பணியாற்றும் ஜியாவுதீன் சர்தாரின் முக்கியப் பணிகளில் ஒன்று, ஷரீஅத் எனப்படும் இஸ்லாமியச் சட்டத்தைப் புரிந்து கொள்ள உதவும் சிந்தனைகளை முன்வைப்பது. நபிகள் நாயகத்தின் காலத்தில் பள்ளிவாசலில் மக்களோடு கலந்தே பல பிரச்சினைகளுக்கான முடிவுகள் எடுக்கப்பட்டன. ஆனால் நவீன கால இஸ்லாமிய ஆட்சிமுறைகளில் இப்படி ஒரு அரசியல் பண்பாட்டைத் தேடிப் பார்க்கவும் முடியாது. மத்திய காலச் சூழலில் இஸ்லாமிய அறிஞர்களால் வரையறைக்குள்ளான ஷரீஅத் ஒட்டுமொத்த ஆட்சி அதிகாரத்தின் வடிவமாக வெட்டிச் சுருக்கப்பட்டுள்ளதை விவரிக்கும் கட்டுரை ‘மறு சிந்தனையில் இஸ்லாமியக் கருத்தாடல்கள்’ என்பது. சமூகநலன் குறித்து இயங்க வேண்டிய ஷரீஅத், மக்களின் பங்கேற்புக்கு வாய்ப்பு தராமல் சமய அறிஞர்களின் ஒருமித்த கருத்து என்கிற அளவில் சுருக்கப்பட்டுள்ளது. ஜிகாத் என்கிற கருத்தாக்கம் ஒரு முஸ்லிமின் ஆன்மிகம் (மற்றும் உளவியல்) எல்லைக்குள்ளே உலவ வேண்டிய ஒன்று. ஆனால் அதன் பொருள் இஸ்லாமிய வெளிவட்டத்தில் மாற்றுச் சமூகத்தினருக்கு எதிரான சொல்லாடலாக மாற்றம் பெற்றுள்ளது. குர்ஆனின் சில வசனங்களை அதன் தோற்றுவாய்த் தன்மைக்கு மாறாக, நவீன அரசியல் நடவடிக்கைகளுக்கான அர்த்தமாகப் புரிந்துகொள்ளும் போது விகற்பமான செயல்பாடுகள் தோன்றுகின்றன. மாறிவரும் சூழல்களுக்கு ஏற்ப இஸ்லாமியக் கோட்பாடுகள் இயங்கியல் தன்மையைப் பெற வேண்டும். அவ்வாறு பெறாதுபோனால் அது பொது இழப்பாகும். எனவே ஜியாவுதீன் சர்தாரின் கருத்துகளைச் சமூகம் உள்வாங்கிக்கொள்ள முயல வேண்டும் என்பது அந்தக் கட்டுரையின் நோக்கமாக உள்ளது.

இஸ்லாம் ஏன் உளவியல் பகுப்பாய்வை நிராகரிக்க வேண்டும்? முந்திய கட்டுரையில் சொல்லப்படும் அதே தன்மைகளைக் கொண்டே இந்தக் கேள்விக்கான பதிலையும் காணலாம். சிக்மண்ட் ஃப்ராய்ட் ஒரு யூதர் என்பதால் அவர் வகுத்த உளவியல் கோட்பாடுகளை இஸ்லாம் சமூகம் ஏற்கவில்லை என்று கூறப்படுகின்றது. இதையும்விட வலுவான காரணம் இன்னொன்று இருக்கின்றது. உளவியல் பகுப்பாய்வு இறுதியில் இறை நிராகரிப்பைச் செய்துவிடும் என்பதான அச்சம். இப்படியொரு அச்சம் சரிதானா? தங்களின் வேதத்தின் மீது முஸ்லிம்களுக்கு இன்னும் உறுதியான நம்பிக்கை ஏற்படவில்லை என்கின்ற நிலைக்குத்தானே இந்நிராகரிப்பு கொண்டு சேர்க்கும்? இந்தக் கட்டுரை இன்னும் விரிவாக எழுதப் பட்டிருக்கலாம்.

‘அதிகார வன்முறைக்கு எதிரான ஜிகாத்’ குடிப் பண்பாடு பற்றிய அவரது கட்டுரையால் உண்டான விளைவுகளைப் பேசுகின்றது. அப்போது உண்டான சலசலப்புக்குரிய காரணங்களையும் குறைபாடான புரிதல்களையும் தன் கட்டுரைக்கு ஆதரவான தரவுகளையும் இக்கட்டுரையில் விவரிக்கிறார். குர்ஆன் உலகப் பொதுமறை என்றே சொல்லப்படுகின்றது. ஆனால் உலகில் பல விசித்திரமான அல்லது கடினமான தொழில் முறைகள் உள்ளன. இந்தத் தொழிலைக் கொண்டே ஜீவிப்பவர்களிடம் உண்டான குடிப் பழக்கம் வெறும் ரவுடித்தனம் அல்லது கெட்ட சகவாசம் அல்லது பொறுப்பின்மை சார்ந்து உருவான பண்பாடல்ல என்று நாம் புரிந்துகொள்ளலாம். அது அவர்களின் வாழ்க்கைமுறை சார்ந்த பொது அம்சம். மலக்கிடங்கைச் சுத்தம்செய்யும் ஒரு தொழிலாளியின் மனநிலையை ஒரு முஸ்லிம் உணர்ந்து அறியாதவரைக்கும், உச்சி வெயிலில் வியர்வை சொட்டச் சொட்டக் கல்லுடைக்கும் ஒரு தொழிலாளியின் போராட்டத்தை உணர்ந்து அறியாதவரைக்கும் இங்கே எதையும் பேசிவிட முடியாது. குர்ஆன்-ஹதீஸ் பற்றிய ஒரு முஸ்லிமின் கருத்து வெற்றுப் பிரமைகளால் உண்டாக்கப்பட்டதாகத்தான் இருக்கும். அவனிடம் உள்ள குர்ஆனியப் பார்வையானது, இஸ்லாமின் மேட்டுக்குடி சார்ந்த, மூளை உழைப்பாளியின் பார்வை சார்ந்த ஒரு குறுகிய தளமாகவே இருக்கும். ஓர் உலகப் பொதுமறை, மலக்கிடங்கைச் சுத்தம் செய்பவனையும் கல்லுடைக்கும் தொழிலாளியையும் அரவணைக்க முடியாமல்தானே போகும்? அறிவுஜீவிகளுக்கு வாய்த்த இஸ்லாம் உலக வாழ்க்கைமுறை சார்ந்து வெளிப்படவில்லை. பொது அரங்கில் தங்களையும் ஒரு தூய முஸ்லிமாகக் காட்ட வேண்டி நிறையப் பேர் அப்போது சின்னச் சின்ன டிராமாக்களை நடத்திக் கொண்டிருந் தனர்-ரசூலுக்கு எதிரானவர்கள் என்னும் போர்வையில்! (முஸ்லிம்களின் வாழ்க்கைமுறையோடு இறுகிப் பிணைந்துள்ள ‘வட்டியும் வட்டி சார்ந்த வருவாய்க்கும்’ எதிரான குர்ஆனிய வாளை அப்போது எந்த இடைக்கச்சில் அவர்கள் சொருகி வைத்திருந்தார்கள் என்பதையே பார்க்க முடியாமல் போயிற்று.) ‘தாராளமய ஷரீ அத்’ கட்டுரையை இன்னும் புரியும் படியாக அவர் விளக்கியிருக்க வேண்டும். சொல்லவந்த கருத்துகளை விட்டுவிட்டு வேகவேகமான ஓட்டம். ஷரீ அத்தைத் தாராளமய நோக்கில் பார்ப்பதற்கு நமக்கு முதலும் முடிவுமாக உதவுவது இந்த காலம் ஜ் வெளி, காலம் ஜ் சூழல் போன்ற தரவுகள்தான். ஓர் அறிவுஜீவியும்கூடக் கடினமான தடைகளைத் தாண்டியே ரசூலின் இந்தக் கட்டுரையைப் புரிந்துகொள்ள வேண்டியிருக்கும். அக்கட்டுரையை அவர் ஒரு கருத்தரங்கில் வாசித்திருக்கிறார். அப்படியானால் வரிக்கு வரி அவர் இடை நின்று விளக்கம் கொடுத்திருப்பாராய் இருக்கும்.

‘முக்கானத்துன்’ என்னும் அரபிச் சொல் மூன்றாம் பாலினத்தாரைக் குறிக்கிறது. அரவானிகள் குறித்துத் தெளிவான வசனங்கள் குர்ஆனில் இல்லை. ஷான்மாமோன் என்ற பெண் ஆய்வாளர் அரவானிகளைப் பற்றிய ஆய்வைச் செய்துள்ளார். மெக்காவின் கஃபத்துல்லாவின் ஹரம் எல்லையிலும் மெதினாவில் உள்ள நபி முகம்மதுவின் சமாதியிலும் அவர்கள் காவலர்களாகப் பணியாற்றுகிறார்கள். இதைத் தவிர அவர்களுக்குக் கௌரவ மளிக்கும் தகவல்கள் (குர்ஆனிலோ-ஹதீஸிலோ) இல்லை. இப்போது நிலவிவரும் அதே மனப்பான்மைதான் அந்தக் காலத்திலும் நிகழ்ந்துள்ளது. முன்கட்டுரையில் குறிக்கப்பட்டுள்ள காலம் ஜ் வெளி போன்ற தரவுகள், மருத்துவ ஆய்வுகள் இன்னும் இஸ்லாமிய உலகில் கவனத்தில் கொள்ளப்படவில்லை என்பது தெரிய வருகிறது. 1984க்குப் பிறகு பாதுகாவல் பணிக்கு மூன்றாம் பாலினத்தாரைச் சவூதி அரசு தேர்வுசெய்யவில்லை. இதெல்லாம் மூன்றாம் பாலினத்திற்கு எதிரான அநீதிகளே.

தொகுப்பில் இடம்பெற்ற கட்டுரைகள் அனைத்துமே இஸ்லாமியப் பார்வையை விரிவுபடுத்தக்கூடியவை. அரேபிய மார்க்கவாதிகளும் மேலை நாட்டு அறிஞர்களும் இஸ்லாத்தைப் பற்றிக்கொள்கிற சாதகமும் பாதகமுமான தகவல்களை உடனடியாகத் தமிழுலகின் கவனத்திற்குக் கொண்டு வருகிற பணியை ஹெச்.ஜி. ரசூல் நீண்டகாலமாகவே செய்துகொண்டிருக்கிறார். முஸ்லிம்கள்மீதும் இஸ்லாத்தின் மீதும் சுமத்தப்படும் குற்றச்சாட்டுகளுக்குத் தக்க பதிலடியைத் தருவதிலும் அவர் பின்தங்கியதில்லை.

இந்த நூலை வெளிக்கொண்டு வந்ததில் கீற்றுப் பதிப்பகம் பாராட்டிற்கு உரியது. ஆனால் தமிழப் பதிப்புலகம் கண்டிருக்கும் பாய்ச்சலைக் கீற்றுப் பதிப்பகம் கவனத்தில் கொள்ள வேண்டும். துணைப்பாட நூல்தான் என்றெண்ணும்படியாக அச்சும் அமைப்பும் உள்ளது.

குர்ஆனிய மொழியாடல்கள் மீள்வாசிப்பின் தருணம்

ஹெச்.ஜி. ரசூல்
பக். : 92 விலை: ரூ. 50
முதல் பதிப்பு: ஜூலை 2008
வெளியீடு
கீற்று வெளியீட்டகம்
1-48கி, அழகிய மண்டபம்
முளகுமூடு அஞ்சல் - 629 167
குமரி மாவட்டம்

நன்றி:காலச்சுவடு

அறிவியல் குறித்த பொதுமக்களின் மனப்போக்குகள்

அறிவியல் குறித்த பொதுமக்களின் மனப்போக்குகள்

- ஸ்டீஃபன் ஹாக்கிங்

நாம் விரும்புகிறோமோ இல்லையோ, நாம் வாழும் உலகம் கடந்த நூறு ஆண்டுகளில் பெரும் மாற்றங்களுக்கு உள்ளாகியுள்ளது. அடுத்த நூறு ஆண்டுகளில் மேலும் பல மாற்றங்கள் உண்டாகும். இம்மாற்றங்களை நிறுத்திவிட்டு, தூய்மையானது எளிமையானது என நினைக்கப்படும் முற்காலத்திற்கு செல்ல வேண்டும் என சிலர் எண்ணுகின்றனர். ஆனால் கடந்தகாலம் அப்படி ஒன்றும் அலாதியானது அல்ல என்பதையே வரலாறு நமக்கு சொல்கிறது. நவீன மருத்துவ வசதிகள் இல்லாதிருந்தும், பெண்களுக்கு பிள்ளைப்பேறு ஆபத்தான ஒன்றாக இருந்தும் – அதிகாரம் பொருந்திய சிறிய சதவிகித மக்களுக்கு கடந்த காலம் பிரச்சனைகள் அதிகமற்றதாகவே இருந்தது. ஆனால் பெரும்பான்மை மக்களுக்கு வாழ்க்கை கரடுமுரடாக, அற்பாயுசுடன் முடிந்தது.

எப்படியும், நாம் விரும்பினாலும், காலத்தை பின்னகர்த்தி முற்காலத்திற்கு செல்வது சாத்தியம் இல்லை. சேகரித்த அறிவையும் தொழிற்நுட்பத்தையும் மறந்துவிட முடியாது. எதிர்காலத்தில் நடக்கவிருக்கும் வளர்ச்சிகளை தடுக்கவும் முடியாது. ஆராய்ச்சிக்கு என செலவிடும் பணத்தை அரசு முழுமையாக நிறுத்தினாலும் (தற்போதைய அரசு இதற்காக தன்னால் இயன்ற அனைத்தையும் செய்கிறது) சந்தை போட்டிச் சூழல் தொழிற்நுட்ப வளர்ச்சிகளை உண்டாக்கும். மேலும், தேடல் கொண்ட உள்ளங்கள் அடிப்படை அறிவியல் குறித்து சிந்தித்துக்கொண்டு தான் இருக்கும், சம்பளம் இருந்தாலும் இல்லாவிட்டாலும். வளர்ச்சியை தடுப்பதற்கான ஒரே வழி உலகம் தழுவிய அடக்குமுறை அரசு ஒன்று புதியவை அனைத்தையும் ஒடுக்குவது தான். ஆனால் மனித முனைப்பும் அறிவும் இதை வென்றுவிடும். இது போன்றதொரு அடக்குமுறை வளர்ச்சி வேகத்தை குறைக்குமே அன்றி தடுக்காது.

அறிவியல் மற்றும் தொழிற்நுட்ப வளர்ச்சிகள் நமது உலகில் மாற்றங்கள் உண்டாக்குவதை தடுக்க முடியாது என்பதை ஒத்துக்கொள்வோமேயானால், அம்மாற்றங்கள் சரியான திசையில் செல்ல நம்மாலான முயற்சிகளை செய்யலாம். ஒரு மக்களாட்சி சமூகத்தில் இது நிகழ, அறிவியல் குறித்த அடிப்படை புரிதல்கள் மக்களுக்கு இருக்க வேண்டியது அவசியம். இப்புரிதல், அறிவியல் குறித்த முடிவுகளை வல்லுனர்கள் கைகளில் விடாமல் மக்களே எடுக்க உதவும். அறிவியல் குறித்த மக்களின் தற்போதைய மனப்போக்கு விருப்பும் வெருப்பும் கலந்த ஒன்றாக இருக்கிறது. அறிவியல் வளர்ச்சியினால் உண்டாகும் வாழ்நிலையின் சீரான வளர்ச்சியை எதிர்ப்பாக்கும் அதே வேளையில், அறிவியல் குறித்த புரியாமையினால் விளையும் நம்பிக்கையின்மையும் இருக்கத்தான் செய்கிறது. இந்த நம்பிக்கையின்மை, கார்ட்டூன்களில் வரும், ஃப்ராங்கிஸ்டைனை உருவாக்க இரவு பகலாக உழைக்கும் பித்தேறிய விஞ்ஞானியின் வாயிலாக வெளிப்படுகிறது. பசுமைக் கட்சிகளுக்கான ஆதரவிற்கான முக்கிய காரணியாக இந்த நம்பிக்கையின்மையே இருக்கிறது. அதே சமயம் அறிவியல் குறித்த ஆர்வமும் மக்களுக்கு இருந்துகொண்டு தான் இருக்கிறது, குறிப்பாக வானவியல் போன்ற துறைகளில். காஸ்மோஸ் (Cosmos) போன்ற தொலைக்காட்சித் தொடர்களுக்கு பெருகி வரும் பார்வையாளர்க் கூட்டமும், அறிவியல் புனைவுகளுக்கு பெருகிவரும் முக்கியத்துவமும் இதை நிரூபிக்கின்றன.

இந்த ஆர்வத்தை எவ்வாறு பயன்படுத்தி மக்களுக்கு அமில மழை, கண்ணாடி கூண்டு அனல் விளைவு பசுமைக்குடில் விளைவு( greenhouse effect), அணு ஆயுதம், மரபுப் பொறியியல் (genetic engineering) போன்ற முக்கிய அறிவியல் நிகழ்வுகள் குறித்த சரியான முடிவுகளை எடுப்பதற்கான அறிவியல் புரிதலை ஏற்படுத்தலாம்? நிச்சயமாக இது பள்ளிகளில் இருந்தே தொடங்கப்படவேண்டும். ஆனால் பள்ளிகளில் அறிவியல் வரண்ட , ஆர்வமூட்டாத வகையிலேயே புகட்டப்படுகிறது. பிள்ளைகளும், நாம் வாழும் உலகில் அவற்றின் பயன்பாடு குறித்து எந்த புரிதலும் இன்றி, மதிப்பெண்களுக்காகவே படிக்கின்றனர். மேலும், அறிவியல் பெரும்பாலும் சமன்பாடுகளைக்கொண்டே சொல்லித்தரப்படுகிறது. கணித கருத்துக்களை விளக்க சமன்பாடுகள் சரியான முறை தான் என்றாலும் அவை பெரும்பாலான மக்களை அச்சுறுத்தவே செய்கிறது. சமீபத்தில் நான் ஓர் பிரபல புத்தகத்தை எழுதுகையில், நான் பயன்படுத்தும் ஒவ்வொரு சமன்பாடும் விற்பனையை பாதியாக குறைக்கும் என அறிவுருத்தப்பட்டேன். ஒரே ஒரு சமன்பாட்டை பயன்படுத்தினேன், ஐன்ஸ்டைனின் பிரபல சமன்பாடான E = mc2. ஒருவேளை அது இல்லாதிருந்தால் விற்பனை இரட்டிப்பாகி இருக்கலாம்.

விஞ்ஞானிகளும் பொறியாளர்களும் தங்களது கருத்துக்களை சமன்பாடுகளாக வெளிப்படுத்துகின்றனர், ஏனெனில் அவர்களுக்கு எண்ணிக்கை ரீதியில் துல்லியமான விடை தேவைப்படுகிறது. ஆனால் மற்றவர்களுக்கு அறிவியல் விடயங்களில் கருத்தாக்க ரீதியிலான புரிதலே போதுமானது. இதற்கு, சொற்களும் விவரண படங்களுமே போதுமானது, சமன்பாடுகள் தேவையில்லை.


பள்ளியில் கற்பிக்கப்படும் அறிவியல் மக்களுக்கு ஓர் அடிப்படை கட்டுமானத்தை அளிக்கிறது. தற்போதைய விஞ்ஞான வளர்ச்சி விகிதத்தை கணக்கில் கொள்ளவேண்டும். பள்ளி, பல்கலைக்கழகத்தை விட்டு வெளியேருவதற்குள் பல புதிய முன்னேற்றங்கள் நிகழ்துவிடுகின்றன. எனக்கு பள்ளியில் மூலக்கூறு உயிரியலை (molecular biology) குறித்தோ, டிரான்ஸிஸ்டர்கள் குறித்தோ சொல்லித்தரப்படவில்லை, ஆனால் மரபுப் பொறியியலும், கணினிகளும் நமது எதிர்கால வாழ்வை முற்றிலுமாய் மாற்றப்போகின்றன. அறிவியல் பற்றிய பிரபல புத்தகங்களும் பத்திரிக்கை கட்டுரைகளும் புதிய முன்னேற்றங்களைக் குறித்து மக்களுக்கு எடுத்துக்கூறலாம். ஆனால் மிக அதிகமாக விற்பனையாகும் புத்தகமும் மக்கள்தொகையில் ஓர் சிறு சதவிகிதத்தினரையே சென்றடைகிறது. மிகப் பரவலாக மக்களை சென்றடைய தொலைக்காட்சி தான் சிறந்த ஊடகம். தொலைக்காட்சிகளில் அறிவியல் குறித்த சில நல்ல நிகழ்ச்சிகள் உள்ளன. ஆனால் அவை அறிவியல் அற்புதங்களை, விளக்கங்களோ அறிவியல் கருத்தாங்களில் இந்நிகழ்வுகளில் பங்கு குறித்தோ ஏதும் கூறாமல், ஒரு மந்திரத்தை போல காட்டுகின்றன. பொழுதுபோக்கு மட்டுமன்றி மக்களுக்கு கற்பிக்கும் கடமையும் தங்களுக்கு இருப்பதை இது போன்ற தொலைக்காட்சி நிகழ்ச்சிகளில் தயாரிப்பாளர்கள் உணரவேண்டும்.

மக்கள் முக்கிய முடிவுகளை எடுக்க வேண்டிய அறிவியல் சம்மந்தப்பட்ட விவகாரங்கள் எவை?

மிக முக்கியமானது அணு ஆயுத விவகாரம். மற்ற பிரச்சனைகளின் – உணவு கையிருப்பு, கண்ணாடி கூண்டு அனல் விளைவு (greenhouse effect) போன்றவற்றின் – விளைவுகள் அதிக கால அளவில் தெரிய வரும். ஆனால் அணு ஆயுதப் போர் சில நாட்களுக்குள் மனித இனத்தையே அழித்துவிடும் வல்லமைக்கொண்டது.

பெண் எப்போது பெண்ணியவாதி ஆகிறாள்?

நம் சமூகத்தில் மட்டுமல்ல, பல சமூகங்களிலும் பெரும்பான்மையான பெண்கள் பெண்ணியவாதிகளாகவோ அப்படி இருப்பது பற்றிய சுய பிரக்ஞை இல்லாமல் வாழ்வதற்கு விதிக்கப்பட்டவர்களாகவோ இருக்கிறார்கள். சமயங்களில் ஆண்களுடனான முரண்கள் ஏற்படும்போதும் அது பெண்களுக்கான பிரத்யேகப் பிரச்சினைகளின் அடிப்படையில் இருப்பதில்லை.




இந்தச் சூழலில் ஒரு பெண் தனது, தன்னைப் போலுள்ள பிற பெண்களின் உரிமைகளை உணர்ந்து அதனடிப்படையில் செயல்படுவதைப் பெண்ணியவாதச் செயல்பாடு எனக் கொள்ளலாம்.




பெண்ணியவாதச் செயல்பாடுகளில் ஒரு பெண் தன்னை ஈடுபடுத்திக்கொள்ளத் தூண்டும் காரணிகளாக இரண்டு அடிப்படை விஷயங்களைச் சொல்லலாம். முதலாவதாக, வாசிப்பின் மூலம் வரும் புரிதல், விழிப்புணர்வு. சிமொன் டி பிவோரிலிருந்து க்ளோரியா ஸ்டெயினம் வரை இதற்குச் சில உதாரணங்களைச் சொல்லலாம். (க்ளோரியா ஸ்டெயினத்தின் குழந்தைப் பருவம் மோசமாக இருந்தாலும் அதற்கு அவர் தந்தையோ பிற ஆண்களோ காரணமல்ல). இரண்டாவது காரணம் அடக்குமுறை. ஒரு பெண் வன்முறைக்குட்படுத்தப்படும்போது, அடக்கு முறைக்கு ஆளாக்கப்படும்போது அதை மீறும் செயல்பாடுகளின் வழியாகப் பெண்ணியம் குறித்த புரிதல்கள் அவளுக்கு ஏற்படுகின்றன. பல சமயங்களில் பெண்கள் இப்படித்தான் பெண்ணியவாதிகளாக மாறுகிறார்கள்.




இந்த வகையில் குறிப்பிடத்தகுந்த உதாரணம் முக்தார் மாய். பாகிஸ்தானிலுள்ள மீராவாலா என்னும் குக்கிராமத்தில் பிறந்த 37 வயது முக்தார் மாய் 2002இல் அவரது கிராமப் (கட்ட) பஞ்சாயத்தாரால் தண்டனைக்குள்ளாக்கப்படுகிறார். மேல் ஜாதியைச் சேர்ந்த சல்மா என்னும் 27 வயதுப் பெண்ணுடன் முக்தாரின் 12 வயதுத் தம்பி ஷாகூர் பாலியல் உறவு கொண்டான் என்பதுதான் வழக்கு. முக்தாரின் குடும்பம் எவ்வளவோ மன்றாடியும் முக்தார் தண்டனைக்குள்ளாக்கப்படுகிறார். அவருக்கு விதிக்கப்பட்ட தண்டனை கூட்டுப் பாலியல் வல்லுறவு (gang-rape). அவரது தந்தை மற்றும் பிற உறவினர்களின் முன்னிலையிலேயே சல்மாவின் சகோதரன் அப்துல் காலிக் உள்பட நான்கு பேர் முக்தாரை பாலியல் வல்லுறவுக்குள்ளாக்கி கிட்டத்தட்ட நிர்வாணமாக வீட்டுக்கு அனுப்புகிறார்கள்.




இப்படிப்பட்ட தண்டனை விதிக்கப்படும் முதல் பெண்ணல்ல முக்தார். அவரது சாதியில் பல பெண்கள் இத்தண்டனையைப் பெற்றிருக்கிறார்கள். இத்தகைய தண்டனைக்குள்ளாகும் பெண்கள் அவமானம் தாங்காமல் தற்கொலை செய்துகொள்வதுதான் வழக்கம். தண்டனை விதிப்பவர்களின் எதிர்பார்ப்பும் அதுதான். ஆனால் தன்னைப் பற்றி வரும் ஒரு பத்திரிகைச் செய்தி, அதன் மூலம் கிடைத்த ஆதரவு தற்கொலை முடிவுக்குக் கிட்டத்தட்ட தயாராகிவிட்ட முக்தாரைத் தன் முடிவை மாற்றிக்கொள்ள வைக்கிறது. இந்த அநீதியை இழைத்தவர்களுக்கு எதிராகப் போராட முடிவுசெய்கிறார். அதிலும் பல சிக்கல்கள். உதாரணத்துக்குச் சில: எழுத, படிக்கத் தெரியாத முக்தார் கொடுக்கும் வாக்குமூலத்தைக் குற்றவாளிகளுக்குச் சாதகமான ஒன்றாக எழுதுகிறார்கள் காவல் துறையினர். குற்றவாளிகளுக்கு எதிராகத் தொடர்ந்து செயல்பட்டால் அவருக்கும் அவரது குடும்பத்துக்கும் ஆபத்து உண்டாகும் என மிரட்டுகிறார்கள். முக்தாரின் உறுதியையும் போராட்டக் குணத்தையும் பற்றிப் பத்திரிகைகள் மூலம் கேள்விப்படும் பல தேசங்களைச் சேர்ந்த பெண்ணிய அமைப்பினர் அவரைத் தங்கள் தேசங்களுக்கு அழைத்துப் பேச வைக்கிறார்கள். பாகிஸ்தானுக்கு அவப்பெயர் உண்டாக்குகிறார் என்று பெர்வெஸ் முஷ்ஷரப் தலைமையிலான பாக். அரசு அவரை ஒருமுறை வெளிநாடு செல்லக் கூடாது எனத் தடுத்தது. “புகழ், பணம், எளிதில் வெளிநாடு செல்லும் வாய்ப்பு வேண்டுமென்றால் பாலியல் வல்லுறவால் பாதிக்கப்பட்டவராக இருந்தால் போதும்” என்று அவரைப் பற்றி அரசாங்க மேல்மட்டத்தில் ஒருவர் சொன்னார்.




இங்கு இன்னொரு வழக்கு பற்றியும் குறிப்பிட வேண்டியிருக்கிறது. 2005இல் ஷாசியா காலித் என்னும் மருத்துவரை அவரது வீட்டிலேயே வைத்துப் பாலியல் வல்லுறவுள்ளாக்குகிறான் ஒரு ராணுவ அதிகாரி. ஷாசியா காலித்துக்கு எந்தச் சிகிச்சையும் அளிக்கப்படவில்லை. மாறாக அவர் ஒரு மனநல மருத்துவமனையில் சேர்க்கப்படுகிறார். குற்றம்சாட்டப்பட்ட அதிகாரி குற்றவாளியல்ல என முஷ்ஷரப்பே சொல்கிறார். கடுமையான நெருக்கடிகளுக்கிடையில் ஷாசியா காலித் உயிருக்கு உத்திரவாதமில்லாத நிலையில் பாகிஸ்தானை விட்டு வெளியேறிவிட்டார். முக்தாரின் தொடர்ச்சியான போராட்டமும் அதனால் ஏற்பட்ட விழிப்புணர்வும் பாகிஸ்தானிய சமூகத்தில் எந்தப் பெரிய மாற்றத்தையும் கொண்டுவந்துவிடவில்லை என்றாலும் முக்தாரின் போராட்டம் முக்கியத்துவம் வாய்ந்தது.




முக்தார் இப்போதும் தொடர்ந்து போராடிக்கொண்டிருக்கிறார். தனக்குப் படிப்பறிவு இல்லாத காரணத்தால் தான் இப்படியொரு நிலை என்று உணர்ந்தவர் தனக்கு வந்த நஷ்ட ஈட்டுப் பணத்தில் மீராவாலா கிராமத்தில் பெண்களுக்கான ஒரு பள்ளியைத் தொடங்கியிருக்கிறார். கிட்டத்தட்ட 300 பேர் அந்தப் பள்ளியில் படிக்கிறார்கள்.




முக்தார் மாய் வழக்கு இன்னும் பாகிஸ்தானின் உச்ச நீதிமன்றத்தில் நிலுவையில் இருக்கிறது. இந்த நிலையில்தான் கடந்த மார்ச் மாதம் 15ஆந் தேதி அப்பாஸ் கபோல் என்னும் காவலரை மணந்திருக்கிறார் முக்தார். முக்தாரின் வழக்கு நடந்துகொண்டிருக்கும் போது அவரது வீட்டுப் பாதுகாப்புப் பணிக்கு வந்தவர் அப்பாஸ். ஏற்கனவே திருமணம் ஆனவர். முக்தாரும் ஏற்கனவே திருமணமாகி விவாகரத்தானவர்தான். அப்பாஸ் முக்தாரைத் திருமணம் செய்துகொள்ளுமாறு கேட்டபோது முக்தார் மறுத்திருக்கிறார். அப்பாஸ் தற்கொலைக்கு முயன்றதுடன் தன் முதல் மனைவியை விவாகரத்துச் செய்துவிடுவதாகவும் மிரட்டியிருக்கிறார். அதனால் பயந்துபோன அவரது முதல் மனைவி முக்தாரிடம் வந்து கேட்ட பிறகே திருமணம் நடந்திருக்கிறது. தவிர, திருமணத்துக்கும் பல நிபந்தனைகளை விதித்திருக்கிறார் முக்தார். அதனடிப்படையில் அப்பாஸின் சம்பளமும் சொத்தும் முதல் மனைவிக்கே சேரும்.




இதனால் பெண்ணியவாதிகள் கடுப்பாகியிருக்கிறார்கள். பெண்ணியவாதியாக இருந்த முக்தார் இப்போது அந்த நிலையிலிருந்து வழுவிவிட்டதாகக் குற்றம்சாட்டியிருக்கிறார்கள். ஏற்கனவே மணமானவரை மீண்டும் மணந்துகொண்டதன் மூலம் பல ஒதுக்கப்பட்ட பெண்களுக்கு ஆதர்சமாக இருந்த முக்தார் அந்தப் பீடத்திலிருந்து விழுந்துவிட்டதாக விமர்சிக்கிறார்கள்.




தனது 66 வயதுவரை திருமணம் குறித்துக் கடுமையான விமர்சனங்கள் கொண்டிருந்த க்ளோரியா ஸ்டெயினம் திடீரென்று 2000இல் பிரபல நடிகரான கிரிஸ்டியன் பேலின் தந்தை டேவிட் பேலைத் திருமணம் செய்துகொண்டார். பேல் ஏற்கனவே இரண்டுமுறை விவாகரத்தானவர். முக்தாருக்குக் கிளம்பியது போல ஸ்டெயினத்துக்கு எதிராகவும் விமர்சனங்கள் கிளம்பின. ஆனால் அது அவரைப் பாதிக்கவில்லை. “1960களிலிருந்து இப்போதுவரை திருமணம் என்கிற சமூக அமைப்பு பல மாற்றங்களைக் கண்டுவிட்டது. அப்போது போல இப்போது நான் எனது உரிமைகளை விட்டுத்தர வேண்டிய அவசியம் இல்லை” எனச் சொல்லி சர்ச்சைகளுக்கு முற்றுப்புள்ளி வைத்தார். தொடர்ச்சியான பெண்ணியச் செயல்பாடுகளாலும் விமர்சனங்களை முறியடித்தார்.




க்ளோரியா ஸ்டெயினம் தனக்கு ஏற்படுத்திக்கொண்ட வாய்ப்பு முக்தார் மாய்க்கு மறுக்கப்படுவதற்கு அவர் சார்ந்த சமூகத்தின் பின்புலம் காரணமாக இருக்கலாம்.




கட்டமைக்கப்பட்ட பெண்ணியத்தின் (Institutionalised feminism) கடினமான கூறுகளை முக்தார் என்றுமே தன்மீது திணித்துக்கொண்டதில்லை. தான் ஒரு தீவிரமான பெண்ணியவாதி அல்ல என அவரது சுயசரிதையில் சொல்கிறார். “என்னை ஊடகங்கள் அப்படி நினைத்தபோதும் நான் தீவிரப் பெண்ணியவாதி அல்ல. நான் பெண்ணியவாதியாக மாறியதற்குக் காரணம் எனது அனுபவம். அதிலிருந்து நான் மீண்டது தான் காரணம். அப்படி நடந்திருக்காவிட்டால் ஆண்கள் ஆளும் சமூகத்தில் நான் ஒரு எளிமையான பெண்ணாக வாழ்க்கையை நகர்த்திக்கொண்டிருப்பேன். ஆனால் நாம் மதிக்கப்பட வேண்டுமென்றால் அது ஆண்களை வெறுப்பதன் மூலம் நடக்காது. அவர்களை வெற்றிகொள்வதில்தான் நமது வெற்றி இருக்கிறது” என்கிறார்.




அந்தச் சம்பவம் நடப்பதற்கு முன் தான் செவிவழி கற்ற குர்ரானைப் பிள்ளைகளுக்குக் கற்றுத்தரும் பணியைச் செய்திருக்கிறார் முக்தார். ஆனால் அதன் பின்னர் அப்படிப் பிள்ளைகள் வளருவதில்லை எனத் தன் சுயசரிதையில் குறிப்பிடுகிறார்.




எப்படிப்பட்ட வெளிநாட்டு வாய்ப்பு வந்தாலும் முக்காடு இன்றி முக்தாரைப் பார்க்க முடியாது. இப்போதும் இஸ்லாத்தின் மீதும் குர்ரானின் மீதும் அவருக்கு இருக்கும் நம்பிக்கை அசாத்தியமானது. மிகத் தீவிரமான பெண்ணியவாதிகளின் பார்வையில் இவையும் பிரச்சினைகளாக இருக்க வேண்டும். இஸ்லாத்தில் நம்பிக்கையுள்ள முக்தார் இரண்டாவது மனைவியாகச் சம்மதித்ததில் எந்த ஆச்சரியமும் இல்லை.




திருமணம் என்கிற முடிவை எடுக்கும்போதுகூடப் பெண்ணிய நிலை நோக்கிலேயே அதை அணுகியிருக்கிறார் முக்தார். “என்னைப் பொறுத்தவரை நான் மூன்று பெண்களின் வாழ்க்கையைக் காப்பாற்றியிருக்கிறேன்” என்கிறார். பின்னணி இதுதான்: முக்தார் வாழும் பகுதியில் மிகப் பிரபலமான பழக்கம் வட்ட சட்டா என்னும் பழக்கம். அதாவது தன் தங்கையை ஒருவருக்குத் திருமணம் செய்துகொடுக்கும் ஆண் பதிலுக்கு அவரது தங்கையைத் திருமணம் செய்வதுதான். அப்பாஸின் இரண்டு தங்கைகளை அவரது முதல் மனைவியின் அண்ணன்மார்கள் திருமணம் செய்திருக்கிறார்கள். அப்பாஸ் தன் முதல் மனைவியை விவாகரத்துச் செய்தால் பதிலுக்கு அவர் தங்கைகளை அவர் மனைவியின் அண்ணன்மார்கள் விவாகரத்துச் செய்வார்கள். தவிர கல்லும் கரையும் என்பது போலத் தான் தனக்கும் ‘அப்பாஸ்மீது காதல் உண்டானதாக’ முக்தார் சொல்கிறார்.




மேலும் அப்பாஸ் தற்கொலை உள்ளிட்ட மிரட்டல்கள் மூலம்தான் முக்தாரைப் பணிய வைத்தாரென்றாலும் அதற்கு முக்தாரை விமர்சிப்பதில் என்ன நியாயம் இருக்கும்?




நமது சமூகத்திலும் திரைப்படங்களிலும் இது மிகச் சாதாரணமான விஷயம். காதல் தோல்வியால், காதல் நிராகரிப்பால் தற்கொலைக்கு முயலும் ஆண்கள் பற்றிய செய்திகள் வராத தினசரிகளே இப்போதெல்லாம் வருவதில்லை. தன்னைக் கதாநாயகியின் மீது திணித்துக்கொள்ளத் தற்கொலை போன்ற ஆயுதங்களைப் பிரயோகிப்பான். . . எந்த கதாநாயகி அந்த ஆயுதத்திற்கு விழாமல் இருந்திருக்கிறாள்? அப்படி இருந்துவிட்டால் அவள் கல்நெஞ்சம் கொண்டவளாகவும் கதாநாயகன் பரிதாபத்துக்குரியவனாகவும் கருதப்படும் அவலநிலைதான் இருக்கிறது. அப்படி முன்முடிவுகள் கொண்ட சமூகத்தில் முக்தார் மாய் போன்றவர்களால் வேறு என்னதான் செய்ய முடியும்?




முக்தார் பிறந்து வளர்ந்த எளிய பின்புலத்திலிருந்து பார்க்கும்போது அவரால் வேறு எந்த முடிவும் எடுத்திருக்க முடியாது என்றுதான் தோன்றுகிறது. வன்முறையின் ஆதிக்கத்திலிருந்து மீளும் உறுதிகொண்ட முக்தார், அன்பு மற்றும் அது சார்ந்த ஆதிக்கத்திலிருந்து மீள முடியாமல் தோற்றுப் போனது அவரது தவறு அல்ல என்றே தோன்றுகிறது.




தவிர, தன்னால் இயன்றவரை இதிலும் பல விதிமீறல்களைச் செய்திருக்கிறார். அப்பாஸைவிட ஏழு வயது மூத்தவர் முக்தார். பாகிஸ்தான் போன்ற நாட்டில் இது ஒரு சாதனை. முதல் மனைவியின் உரிமைகளும் சலுகைகளும் கொஞ்சமும் பாதிக்காத வகையில் அவர் செயல்பட்டிருக்கிறார். இந்தத் திருமணத்தால் தான் நடத்தும் பள்ளிக்கூடத்துக்கும் தனது லட்சியத்துக்கும் எந்தத் தடையும் வரக் கூடாது என்பதில் தெளிவாக இருக்கிறார்.




முதல் கணவருடன் விவாகரத்து ஆன பிறகு குர்ரான் சொல்லித் தருவதிலும் சப்பாத்தி இடுவதிலும் தனது எஞ்சிய காலத்தைக் கடத்தியிருக்க வேண்டிய முக்தார் மாய், வாழ்வு அவருக்குக் கற்றுக்கொடுத்த பெண்ணியக் கருத்தியலைப் பல சமரசங்களுக்கிடையிலாவது தான் சார்ந்த சமூகத்தில் கடைபிடிப்பது தான் அவரது வெற்றி. போராட்டம், தற்கொலை என்னும் இரண்டு பாதைகள் தெரிந்தபோது தனக்கு முன்பிருந்தவர்கள் செய்தது போலத் தற்கொலை என்னும் பாதையைத் தேர்ந்தெடுக்காமல் கடினமானதெனினும் போராட்டம் என்னும் பாதையைத் தேர்ந்தெடுத்ததுதான் முக்தார் மாய் என்னும் பெண்ணியவாதியின் அசலான அடையாளம்.

நன்றி - காலச்சுவடு